Es Lied voll Sunneschyn
Stephan Haldemann
- 1 -
Wär cha jutze u ma singe,
dä gseht drinn e töiffe Sinn.
Drum wei mir hütt Fröide bringe
mit däm Lied voll Sunneschyn.
Hälfe tuets zu allne Zyte,
s’treit eim ou i schwärer Schtund.
Läbt me uf dr Schattesyte,
gloub doch dra, dass’s besser chunnt!
- 2 -
Jedes Blüemli luegt gäg d’Sunne,
so cha’s wachse, s’git ihm Halt.
Isch die Wermi de verschwunde,
wird es truurig und het chalt.
Grad eso geits i Dim Läbe,
bruchsch doch geng chly Sunneschyn.
Süsch tüecht’s eim, s’syg alls vergäbe,
u magsch nümme fröhlech sy.
- 3 -
S’lyt e Chraft i üsem Singe,
wo Dir hilft für jede Tag.
Me cha so dr Friede finge,
dass me ume liede mag.
Gschpürsch i Dir nid ou es Plange
nam ne warme Sunnestrahl?
Packt Di plötzlech de ds Verlange,
jutz vor Fröid, probiers es Mal!