Früehligserwache
Hannes Fuhrer
- 1 -
Warmi Sunnestrahle wecke
di chalti Winterärde uf,
us Schründ u Chräche gurglet ds Wasser
u springt dervo dür ds Täli us!
Solo + Überstimme:
O liebe Früehlig, wi hei mir planget,
uf di schönschti Zyt im Jahr!
No ersch si graui Wulche ghanget,
jetz isch alles häll u klar!
Klub:
Da het d'Natur Wunder vollbracht,
Da het d'Natur es Kunschtwärch gmacht!
- 2 -
Jedes Tierli isch erwachet,
wo d'Winterszyt verschlafe het,
u d'Vogelschar i Luft u Böime,
voll Fröide liedet sy um d'Wett!
Solo + Überstimme:
O liebe Früehlig, mir wei üs fröije,
a dir Bluescht u Bluemepracht!
Du lasch dir's gwüss a nüt la röije,
treisch ou geng di schönschti Tracht!
Klub:
wie 1. Strophe
- 3 -
I mim Härz fahts ou a blüje,
we n'ig das Wunderwärch darf gseh,
cha jedi Sorg u ds Leid vergässe,
der gröschti Schmärz tuet halb so weh.
Solo + Überstimme:
O liebe Früehlig, mir wei dir danke
für die wunderbari Zyt!
Das' ou nach graue, schwäre Tage,
wieder Bluescht u Sunne git!
Klub:
wie 1. Strophe