Früehligsstrahle
Emil Herzog
- 1 -
Wär düsselet dür ds Ländli us
im bunte Sametchleid?
Me gschpürt's u schmöckt's i Fäld u Wald,
im Tal und uf der Weid,
o d'Böim u Strüchli stöh nid zrügg,
hei ds nöie Gwändli ah
u d'Vögel singe voller Fröid,
der Früehlig isch ja da!
- 2 -
Ganz fyn u zart i'r schönschte Pracht
stöh d'Blüemli alli da,
o ds Beji rybt sech d'Öigli us,
wott jitz z'Wisite gah.
Vo wyt här ghört me wie im Troum
ganz lys es Herdeglüt,
der Früehlig isch halt hüt no geng
die schönschti Jahreszyt!
- 3 -
Der Grossatt u ds Grossmüetterli,
si lah sech ou vor ds Huus,
sie höckle uf em Bänkli ab
u luege d'Hoschtert us.
Wie glänzt das silberwysse Haar
im Früehligssunnestrahl;
ob si ächt ds Jahr no zäme sy?
Das lyt i Gottes Wahl!