Männertreu
Emil Herzog
- 1 -
Männertreu im schlichte Gwändli,
läbsch so ganz für dich alei
z'obersch, höch im Schwitzerländli
i dim Gärtli volle Stei,
bisch mit Tau und Sunne z fride,
blibsch der Heimatärde treu,
magsch au Sturm und Froscht verlyde
du mis Blüemli Männertreu!
- 2 -
Wänds im Läbe ou so halte,
fescht u grad zur Heimat stah,
s Ländli lieb und suber bhalte
und vo keim vernüte lah,
Fride wirt nie vonis wyche
sind mir nu durume treu,
düent mir dir in allem gliche
du mis Blüemli Männertreu!
- 3 -
So will s Blüemli Säge bringe
uf der ganze Erdewält,
wo s am Liebha und am Singe
und am guete Wille fählt,
Lass din schöne Name wandre,
gheiss s Volk fridli si und treu,
sägs deheime und de nandre
du mis Blüemli Männertreu!