Mys Älpli
Margrith Inäbnit
- 1 -
Uf mys Älpli bin i gange,
dert bim Hüttli bin i gsy.
S'zieht mi geng zur Wättertanne
u däm liebe Plätzli hi.
Nei, im Tal isch niene so,
uf dr Alp wird ds Härz so froh;
nei im Tal isch niene so,
drum mues i geng ume cho.
- 2 -
Ou my Ätti isch dert gsässe,
ach, mängs Jahr isch scho verby.
Doch i wirde's nie vergässe,
was sy guete Rat isch gsy.
Drückt im Tal di Sorg und Leid,
gang uf d'Alp, da fingsch dy Fröid;
drückt im Tal di Sorg und Leid,
gang uf d'Alp, het är mir gseit.
- 3 -
S'isch no hütt wie denn vor Zyte:
ds'Hüttli steit no zfride da.
U bi rächte Älplerlüte
cha me's hütt no luschtig ha.
D'Bärge, ds Veh und ds Gloggeglüt,
säg mer du, was 's schöners git!
D'Bärge, ds Veh und ds Gloggeglüt;
b'hüet euch Gott, ihr Chüejerlüt.