s'Grüchtli
Ruedi Bieri
- 1 -
Geit es Grüchtli uf ne Reis,
de macht es gli e grosse Kreis.
Jede tuet si Sänf derzue
so wird es Chälbli grad zur Chue.
Am Ändi chunnt no ds’Sätzli dra,
i wott ja nüt gseit ha.
- 2 -
Der Erschti seit er heig’s verno,
der Zwöiti nimmt nur ds’Bescht dervo.
Der Dritti het’s scho sälber g’seh,
jetz git’s da dra kei Zwifel meh.
Und jede hänkt no ds’Sprüchli dra,
i wott ja nüt gseit ha.
- 3 -
Grüchtli wärde nie usgah,
geit eis verbi, isch ds’andre da.
S’brucht äs Bitzli Fantasie,
ja ds’Opfer das cha jede si.
Doch eis ghört immer hindedra,
i wott ja nüt gseit ha.