S'Jodlerhärz
Walter Stadelmann
- 1 -
I ha nes Jodlerhärz z'verschänke
a öpper mit viel Heimatsinn.
A liebi Lüt wo ähnlech dänke
a Lüt wo ds Bruchtum hüete z'innerscht inn.
(Solo: Drum säg-i dir warum i singe,
warum i jutze voller Luscht.)
Es faht im Härz so schön aa schwinge
i gschpüre d'Fröid i miner Bruscht. (2x)
- 2 -
Vom Schaffe müed dänk i am Aabe
wenn i doch hüt nid müessti gah,
stahni de aber i dr Reihe
vo mine Jodlerlüt i d'Mitti gnoh!
(Solo: De bini froh chan i no singe,
ha Fröid we's klingt im ganze Chor.)
Das cha nur Schön's i Alltag bringe
ha mängi Melodie im Ohr.
Das mues doch Schön's i Alltag bringe
ha mängi Melodie im Ohr.
- 3 -
Mis Jodlerhärz chasch nid verdriesse,
es schlaht so lang der Herrgott wott.
Drum wott i’s gschpüre, wott i’s gniesse,
s'chunnt einisch d’Zyt wo's müed isch u nümm schlaht.
(Solo: De wünsch i mir vo ganzem Härze,
dass Gsinnig blibt, und mini Freud,)
tuet überschpringe wie ne Funke
und mänge Jutz uf d'Ärde schtreut. (2x)