1995 75 Jahr-Jubiläum

Vom damaligen Präsidenten Lorenz Steiner

Liebi Jodlerfründe vo nah u färn, liebi Gescht,
dr Jodlerklub "Alperösli" fyret hütt es grosses Fescht.
Drum hani probiert, es paar Värse z dichte,
für Öich öppis vo üsere Klubchronik z brichte.
Es isch bereits scho im Jahr 1918 gsy,
wo vier Brüeder Bichsel u süsch no zwe Maa derby,
mit dr Zyt einisch ds Gfüehl hei gha,
hie z Münsige sött o ne Jodlerklub beschtah.
Me isch de bald zur Gründig gschritte,
Ihr liebe Lüt, so isch es gschribe,
und so isch es im Jahr 1920 de o gscheh,
dass me dä Jodlerklub het chönnte ghöre u gseh!

Für dä Klub, wo so schön cha singe,
het me doch e bedütigsvolle Name müesse finge.
Si hei denn a nes Alpeblüemli dänkt,
wo nid grad bi jedem Schturm sys Chöpfli hänkt,
eis wo nach Räge, Ryf u Schnee
geng ume syni Blüetepracht lat la gseh!
Es Blüemli, wo mängisch o grad über Nacht,
syner choschtbare Chnöpfli gär ufmacht.
Es isch ds Alperösli - Dir heit's errate -
wo mir no hütt schtolz uf üsne Mutze trage.
Zu däm zarte Pflänzli hei die Manne geng sorg gha,
drum stö me hütt als prächtigschöni Blueme da.

Natürlech isch o ne musikalische Leiter derby,
dr Lehrer Hans Hegg isch dr erscht Dirigänt gsy,
er het mit sächs Sänger die erschte Probe gha.
Hütt im Jubeljahr begrüesst dr Stephan Haldemaa
all Mittwuchaabe vierezwänzg Sänger im Trube-Saal,
alti und nöiji Lieder z üebe git es jedesmal.
I der Zwüschezyt hei zersct Schär u Müller dr Ton aaggäh,
vo Hüscher, Hofer u Stäger hei mer o öppis chönne aanäh.
I dene 75 Jahre grad nume sibe dirigänte z ha,
i gloube, das cha me mit guetem Gwüsse gälte la.
Es blybi drum jitz o nachträglech nid ungerwäge,
ine für iri Ufgaab vo Härze "Danke" z säge!

Üse Probe-Flyss het aber o schöni Erfolge bbrunge,
a mängem Jodlerfescht hei mer es "Sehr gut" usegsunge.
Ou ds Konolfinger Amtsjodlerträffe wei mer nid vergässe,
wo mir üs problemlos mit de angere Klüb chöi mässe.
Im Märze tüe mir mit üsem Theatere u Singe
de Lüte Fröid u Abwächslig i grau Alltag bringe.
Dernäbe tüe mir Jodler o scho über füfzg Jahr
d Schlossallee-Chilbi dürefüehre, ja, 's isch wahr.
Mängisch göh mir o d d Chilche ga singe,
i Spital u Altersheim sött me öppe es Ständli bringe!
Mit em Lotto chöi mer albe ds Kässeli chly saniere
und eso üsi Froue uf nes Reisli entfüehre.

So, das wär i churze Züge d Gschicht vom Alperösli gsy,
verständlecherwys sy kener grosse Einzelheite derby.
Doch ds Wichtigschte, das darf i jitz nid vergässe,
my Dank a alli isch nämlech chuum z ermässe.
Vorab geit er a üsi Gründer und a d Ehremitglieder,
si hei das Alperösli pflanzt, u de immer wider
guet zue-n-im gluegt, für dass es nie u nüüt
vo syre Lüüchtchraft verlore het bis hütt!
Deräbe möchte mir üsi Froue i das Merci yschliesse,
ir Ysatz u ds Verständnis tüe mer sehr begrüesse.
Zletscht wünsche-n-i, mir alli mögi üs bemüeje,
dass üses liebe Alperösli nie tuet verblüeje!

Öie Presidänt im Jubeljahr
Lorenz Steiner