Dem Jodlerklub Alpenrösli zum 20. Jubiläum

Oskar Friedrich Schmalz - 1940

Vor zwänzg Jahr heit dir voller Freud
E rächti Bärnertoufi gha,
Dir heit e Chranz voll Alperösli
Em Jodlerklub i d'Wiege ta!

Gar mängs isch i de Länge Jahre
Passiert, u gwächslet het halt Freud u Leid,
Doch heit ou dir's hie ja erfahre
Es geit, we me's mit'nander treit!

I weis no, wie mir froh hei gsunge,
Wo ds Jodlerfescht bi euch isch gsy
Wie fröhlech d'Stimme hie hei klunge
Bie Lied u Jutz u Tanz u Wy!

Dä Platz under de alte Bäume,
Die wyte Fälder z'ringsetume,
U d'Alpe, wo das Bild umsäume
Hei so guet passt zum Sennetum!

U sy ou syder schwäri Zyte
für üsers liebe Ländli cho,
We d'Treichle ume-n afa chyte
So weiss jede Jodler o

Jitz heisst es, sich für d'Heimat wehre,
Jitz heisst es erscht rächt zämestah,
Für ds Vaterland i Chraft u Ehre
Dr Freiheitsgeischt nie fahre la!

Dir Jodler traget eues Mutzli
Gwüss ou als Zeiche, dass euch ds Härz
Für eui Heimat, Frou u Butzli
Höch usschlaht - u dass himmelwärts

Dr Wunsch i euch tuet mächtig glüeje,
Dass früsch u froh, bi Lied u Gsang
Dr Jodlerklub chönn wyterblüeje,
I Freiheit - eues Läbe lang!